יחזקאל קארען

הרב יחזקאל קארען (ענגליש: Eric Cohen; ט״ו שבט תשי״ב – כ״ד תשרי תשפ״א) איז געווען ראש ישיבה פון דער קול תורה ישיבה קטנה אין בית וגן, ירושלים.

ביאגראפיע

יחזקאל קארען איז געבוירן געווארן יחזקאל כהן אין סונדערלאנד, ענגלאנד, צו זיינע עלטערן שלמה ״סאלי״ כהן און זיין ווייב מינא.

ער האט געלערנט אין קול תורה און דערנאך אין דער פאנאוועזשער ישיבה ביי רבי דוד פאווארסקי און רבי שמואל ראזאווסקי. הרב אלחנן משה קונשטאט, ראש ישיבה פון דער קול תורה ישיבה האט אים גענומען פאר אן איידעם, פאר זיין טאכטער מרים, און ער איז געווארן א מגיד שיעור אין דער קול תורה ישיבה קטנה. אזוי ווי זיין משפחה זענען נישט כהנים האט אים הרב שלמה זלמן אויערבאך באראטן צו ענדערן זיין משפחה נאמען פון כהן צו קארען.

נאך זיין שווער׳ס פטירה האט הרב שלמה זלמן אויערבאך אים געבעטן ווערן ראש ישיבה פון דער ישיבה קטנה. אויך איז ער געווען ראש ישיבה פון דער ״דרכי שמואל״ ישיבה קטנה אין בית שמש און נשיא פון די ״חדרה״ ישיבה קטנה אין מודיעין עילית.

ווען ער איז געווען א יונגערמען האט ער געליטן פון ראק אבער איז דערהיילט געווארן דערפון.

נאך ראש השנה תשפ״א איז ער געווארן קראנק מיט קאוויד-19 און נאך שמחת תורה, אום כ״ד תשרי, איז ער נפטר געווארן פון זיין קראנקייט. מען האט אים באערדיגט דעם זעלבן טאג אין הר המנוחות.

רעפערענצן

• ברוך דיין האמת: הגר״י קורן
• דער ארטיקל "יחזקאל קארען", ביי המכלול