לייב פולווער

לייב פּולווער (18טן דעצעמבער 1883- 18טן מערץ 1970) איז געווען א יידישער רוסישער מוזיקער.

לייב פולווער
Лев Пульвер

געבורט	6 דעצעמבער 1883 (יוליאניש) אוקראינע
טויט	18 מערץ 1970 (אלט 86) מאסקווע, סאוועטן פארבאנד
מדינה	רוסלענדישע אימפעריע, סאוועטן פארבאנד
פאך	דיריגענט, קאמפאזיטאר

לעבן

לייב פּולווער איז געבוירן געווארן דעם 18טן דעצעמבער, 1883, אין ווערכנעדנעפּראָווסק, לעבן קאַטערינאָסלאַוו, אמאליקע רוסלענדישע אימפעריע (היינט דניפּראָפּעטראָווסק, אוקראינע). ער האט געשטאמט פון א משפּחה פון א דורותדיקן כליזמר-יחוס.

פּולווער האט שטודירט פידל פון קינדהייט אן, פריער ביי זיין טאטן, דערנאך ביי זיין שוואגער – א שילער פונעם טשעכישן פידלער אָטאַקאַר שעווטשיק, און נאך שפעטער - ביים שילער פון ל.אאוער-ד.בערטיע. פּולווער האט גראַדואירט פֿון דער פּעטערבורגער קאָנסערוואַטאָריע, וווּ ער האט שטודירט סיי פידל ביי נ.גאלקינען, סיי קאמפאזיציע ביי א. ליאַדאָוון. יונגערהייט האט ער געשפילט אין כליזמרשע קאפעלעס, סאלירט מיט קלאסישער מוזיק, געווען אַ פידלער און קאמפּאָזיטאר אין מ.קראפיווניצקי'ס אוקראינישן טעאטער. דערנאך איז ער געווען אַ סימפאַנישער קאָנצערט-מייסטער און דיריגענט, א גרונטלייגנדיקער מיטגליד פונעם סטראַדיוואַרי-קוואַרטעט. ער איז געווען דער מוזיק-לייטער פון דעם יידישן מלוכישן טעאַטער אין מאָסקווע. פּולווערן האט מען צוגעטיילט די ערן-טיטלען פונעם פאלקס-ארטיסט פון דער רספס"ר און פונעם פארדיסטפולן קונסט-טוער פון דער רספס"ר.

ווערק

פּולווער האט געשאפן בינע-מוזיק, אַרייַנגערעכנט די מוזיק צו שייקספּיר'ס "קעניג ליר", שלום עליכם'ס "200.000" און "דער לופט-מענטש".באנאנד מיט לייב יאמפאלסקין און שמעון שטיינבערגן איז ער געווען פון די אמערסטן פרוכטבארע מוזיק-שעפער פאר יידישער בינע אינעם אמאליקן ראטן-פארבאנד. א חוץ דעם האט ער פארפאסט אַפּערעטעס ("גוליווער","אונטערן צירק-קופל"),פילם-מוזיק,זינגלידער און באארבעטונגען פון יידישע פאלקס-לידער.א סך פון זיינע ניגונים האלט מען פאר מוסטערן פונעם יידישן מוזיק-פאלקלאר. ער איז געווען פון די וויכטיקע מוזיקער וועלכע האבן צונויפגעפלאכטן די יידישע פאלקס-מוזיק מיט די מערבדיקע קלאסישע מוזיק-פאָרמען.

רעקאָרדירונגען

עס זיינען פאראן עטלעכע רעקאָרדירטע מוסטערן פון זיין מוזיק אין דער אויספילונג פון דעם מאסקווער מלי"ת אָרקעסטער מיט שלמה מיכאָעלסן און בנימין זוסקינען, ווי אויך פון די זינגער שלמה כראָמטשענקאָ, מישא אַלעקסאַנדראָוויטש, נחמה ליפשיץ, מאַרינע גארדאן, און פון די שוישפילער רחמיאל גאָראָוועץ און באָריס לאנדאאו.