חיים הערש מייזליש

הרב חיים הערש מייזליש (געבוירן ג' תשרי תש"ל) איז ראש ישיבת סאטמאר און לאקאלער פירער פון א גרויסער טייל פון דער סאטמארער קהילה אין בני ברק.

חיים הערש מייזליש

הרב חיים הערש מייזליש
געבורט	15 סעפטעמבער 1969 (אלט 55) ג' תשרי תש"ל אמעריקע
טעטיקייט ארט	בני ברק
באלאנג	סאטמאר
פאטער	בעריש מייזליש

ביאגראפיע

ער איז געבוירן צו זיין פאטער רבי בעריש מייזליש אב"ד קהילת סאטמאר בארא פארק און צו זיין מוטער רביצין חיה, עלטסטע טאכטער פון רבי משה טייטלבוים, דער ״ברך משה״ פון סאטמאר.

ער הייסט נאך זיין זיידע דער 'עצי חיים'.

ער האט געלערנט אין ישיבת סאטמאר אין ירושלים ביי רבי משה אריה פריינד.

ד' כסלו תשמ"ח האט ער חתונה געהאט מיט רעכיל דבורה, טאכטער פון רבי ישראל האגער, וויזשניצער רבי אין בני ברק.

ער איז מוסמך געווארן להוראה דורך הרב שמואל הלוי וואזנער און הרב יצחק יעקב ווייס.

און יאר תשנ"ב איז ער אריבער וואוינען קיין ירושלים וואו ער האט געדינט אלס ראש כולל יטב לב

אין יאר תשנ"ה איז ער געווארן א חלק פון הנהלת בית היתומים דיסקין.

נאך וואס רבי משה אריה פריינד איז נסתלק געווארן איז ער נתמנה געווארן דורך זיין פעטער דער סאטמארער רבי רבי אהרן בשם זיין זיידע דער ברך משה אלס ראש ישיבת מהרי"ט ד'סאטמאר, און אלס שיינער איד אינעם סאטמארער בית המדרש אין זכרון מאיר געגנט אין בני ברק לצידו פון הרב אליהו כ"ץ זצ"ל דער רב הקהילה.

הנהגת הקהילה אין בני ברק

נאך דער פטירה פונעם ברך משה אין יאר תשס"ו איז די סאטמארער קהילה גלאבאל צעטיילט געווארן אין צוויי, צווישן די צוויי זוהן הרב אהרן טייטלבוים און הרב זלמן לייב טייטלבוים. הרב מייזליש האט זיך צוגעשטעלט צום עלטערן ברודער רבי אהרן אינאיינעם מיט רוב רובו פון דער סאטמארער קהילה אין בני ברק, און בלויז א קומץ קטן פון די קהילה און שפיץ פון הרב כ"ץ האבן זיך צוגעשטעלט צו רבי זלמן לייב.

במשך יארן לאנג איז הרב מייזליש געווען דער משפיע רוחני און שיינער איד אין דער קהילה, און ארויס געהאלפן יעדן יחיד אין דער קהילה, ומאידך גיסא אונטערגענומען פארשידנארטיגע שריט אז רבי זלמן לייב'ס אנהענגער זאלן זיך נישט הייבן די קעפ. במשך די אלע יארן איז הרב יחזקאל ראטער מראשי הקהילה געווען זיין סאמער נענטסטער מענטש און געשטאנען צו זיין רעכטער האנט ארויסצוהעלפן מיט אלע פעולות ועסקנות.

אום שבת שקלים שנת תשע"ז האט אויסגעבראכן א מחלוקת צווישן הרב מייזליש און הרב ראטער. אין אנהייב האט עס אויסגעקוקט ווי א מינדערוויכטיגער רייבעריי וואס קען גרינג פארגלעט ווערן, אבער אין די נאכפאלגנדע שטיק צייט האט זיך עס נאר פארגרעסערט און פארשארפערט, און זיך ארויסגעשטעלט צו זיין א פייערדיגער קאמף וואס האט אריינגעשלעפט מיינסטנס קהילה מיטגלידער. א גרעסערער טייל קהילה מיטגלידער האט זיך צוגשטעלט צו הרב מייזליש, און טראץ וואס במשך די צייט האט זיך דער סאטמארער רבי, רבי אהרן, אריינגעמישט אין דעם מחלוקת און זיך אנגענומען פאר הרב ראטער האט דאס נישט צופיל באאיינפלוסט די מיינונגען פונעם ציבור.

נאך עטליכע יאר פון ביטערע אויסטוישן צווישן די צוויי צדדים וואס האט עטליכע מאל געגרייכט צו א קלימאקס פון ווילדע געשלעגערייען, האט דער סאטמארער רבי, רבי אהרן, אין א היסטארישע שריט געהאלטן א ספעציעלע שארפע רעדע קעגן הרב מייזליש, ווי ער האט זיך צווישן אנדערע זיך אויסגעדריקט ״אין אני והוא יכולין לדור במדור אחד״, און פארלאנגט פון זיינע נאכפאלגער זיך צו אויסוועלן "הלנו אתם או לצרינו?", און מיט דעם פארבאטן א יעדן מינדעסטן קשר מיט הרב מייזליש.

אבער מיט דעם אלעם זענען נאך יענע נאכט הארט נאכן רעדע פילע צענדליגער קהילה מיטגלידער אריבער געקומען צו הרב מייזליש'ס הויז זיך צו אידענטיפיצירן מיט אים, און טייל האבן אים זאגאר איבערגעגעבן קוויטלעך - וואס מ'גיבט געווענליך נאר פאר א רבי, ווי צו דערקלערן רעוואלט און אויסרופן אונז האבן שוין א נייע רבי, און אונז קימערן זיך נישט מיט רבי אהרן'ס רעדעס...

אלס א רעזולטאט פון די פייערדיגע מחלוקת האט זיך די קהילה צעטיילט אין צווייען. דער גרעסערער טייל איז פארבליבן ביי הרב מייזליש, און דער עטוואס קלענערער טייל איז אריבער צו הרב ראטער. הרב מייזליש מיט זיינע שטיצער זענען פארבליבן אינעם אלטן גרויסן בית המדרש וואס געפינט זיך אויף רחוב קדושת יום טוב 7. א ריזן ביהמ"ד פון ארום 285 מעטער.

ווידער מיט הרב ראטער און זיינע שטיצער איז די מעשה פארשידנארטיג: אין די ערשטע דריי יאר האבן זיי זיך צייטווייליג איינקוואטירט אינעם בית המדרש פונעם בנין התלמוד תורה וואס געפינט זיך אויפן פערטן שטאק פונעם בנין. דאס וויילן אין דעם בית המדרש איז געווען א גרויסער דיעבד, סיי צוליב איר רעלאטיוו קליינער מאס, און סיי צוליב די הויכע שטאק וואס זי געפינט זיך, דעריבער האבן זיי אום חודש אלול תשפ"ג אין א טיילווייז אומלעגאלער שריט אינטערגענומען מאסיווע בוי ארבעט, און אויסגעהאקט און אויסגעהוילט טייל פון די ערשטע צוויי שטאק פונעם בנין הת"ת, און עס האט זיך אנטפלעקט א מאסיוון היכל הבית המדרש פון אריבער 400 מעטער גרויס.

אין לויף פון די יארן האט די סאטמארער קהילה אין בני ברק אהערגעשטעלט זעקס קהל'ישע בנינים צו סערווירן די קהילה מיטגלידער. 1) דער צענטראלער בית מדרש ויואל משה ד'סאטמאר. 2) ביהמ"ד זכרון מאיר אויף רחוב הרב האלפערן. 3) ביהמ"ד סאטמאר אויף רחוב רמב"ם. 4) בנין התלמוד תורה. 5) בנין הבית רחל. 6) די נייער פראכטפולע שולע געביידע אויף רחוב השל"ה וואס האלט שוין ביי די לעצטע פאזעס.

ביי די מחלוקת האט זיך אויסגעשטעלט אז פינף פון די זעקס בנינים זענען אריינגעפאלן ביי הרב ראטער און בלויז דער צענטראלער בית מדרש ויואל משה איז אריינגעפאלן צו הרב מייזליש. אלע פראוון פון הרב מייזליש צו געווינען בעלות אויף די בנינים, סיי לעגאלע און סיי בכח הזרוע זענען טאטאל דורכגעפאלן.

הרב מייזליש'ס מענטשן טענה'ן אבער אז די אנדערע בנינים האבן נישט קיין פאליטישע ווערט און משמעות, און אז דער מערסט ווערטפולער בנין איז דער צענטראלער בנין הבית מדרש וואס דאס ליגט יא ביי זיי אין די הענט.

קינדער

ר' חיים הערש און זיין ווייב רעכיל דבורה האבן צען קינדער, זיי זענען ווי פאלגנד:

• • מרת מרגלית, ווייב פון הרב שלום, זון פון רבי אריה לייביש טייטלבוים, דער געוועזענער אב"ד קהל ויואל משה ד'סאטמאר אין מאנטיסעלא.
  • הרב יואל, האט געהייראט מרת ליפשע, טאכטער פון רבי יוסף פאנעט, דעעשער רבי פון ירושלים.
  • הרב משולם זוסיא, האט געהייראט מרת נחמה האלבערשטאם, טאכטער פון אב"ד קשאנאוו בארא פארק.
  • הרב שמעון, האט געהייראט זיין שוועסטער קינד מרת חיה, טאכטער פון זיין פעטער רבי יקותיאל יהודה מייזליש, דומ"ץ סאטמאר אין בארא פארק און איידעם פון רבי נפתלי צבי ווייס, ספינקער רבי אין בארא פארק.
  • הרב חנניה יום טוב ליפא, האט געהייראט מרת נחמה פערל, טאכטער פון רבי יצחק דוד הורוויץ, אב"ד ראצפערט בראזיל.
  • הרב זאב, האט געהייראט מרת מרים איידל דינה, טאכטער פון רבי סיני האלבערשטאם, אב"ד שיכון ג' אין בני ברק.
  • הרב אלעזר, האט געהייראט מרת אסתר, טאכטער פון הרב שמעון שמואל האלבערשטאם, ראש כולל דברי משה אין ירושלים, זון פון רבי משה האלבערשטאם, דער געוועזענער אב"ד טשאקאווע און מיטגליד פון בד"צ עדה החרדית.
  • מרת הינדא, ווייב פון הרב משולם ישכר, זון פון הרב חיים יהודה אריה לייביש באב"ד, ראש ישיבת תורת חסד אין לאנדאן, ענגלאנד.
  • הרב יקותיאל יהודה, האט געהייראט מרת חיה צירל, טאכטער פון הרב יואל איתמר קרויז, זון פון רבי שמואל דוד, אודווארי רב פון וויליאמסבורג און איידעם פון רבי יעקב האגער, דער סערעט-וויזשניצער רבי.
  • הרב אהרן, האט געהייראט א טאכטער פון הרב מנחם מענדיל פאנעט, זון פון רבי יצחק יחיאל מיכל פאנעט דעעשער רבי פון בני ברק.

וועבלינקען

• דרשה וואס רבי אהרן פון סאטמאר האט געלאזט הערן קעגן רבי חיים הערש מייזליש,