אברהם סופר (ירושלים)

הרב אברהם סופר (שרייבער) (9טן אקטאבער 1897 - 10טן אפריל 1982) איז געווען א רב און ארויסגעבער פון תורה ליטעראַטור. געווינער פון ישראל פרייז פאר תורה ליטעראטור, און געווינער פון הרב קוק פרייז.

סופר איז געבוירן געווארן אין עגער (ערלוי), אונגארן, א זון פון רבי שמעון סופר און אן אייניקל פון הרב משה סופר (דער חתם סופר).

ער האט אין זיין יוגנט געלערנט ביי זיין פאטער, ערלויער רב, און שפעטער אין א ישיבה אין פערשבורג, און איז געווארן פארגעשטעלט צום רבנות. אין 1921 האָט ער חתונה געהאַט און איז אַריבער קיין ווין, עסטרייך. סופר האט געדינט אלס רב, קודם אין קארפו (1925-1928) און דערנאך אין גאריזיע אין איטאליע (1928 - 1936) און פיאמא (1936 - 1939). אין 1939 איז ער ארויף קיין ארץ ישראל און האט זיך באזעצט אין ירושלים תובב"א, וואו ער האט געדינט אלס רב פון דער ישיבת שערי ציון געגרינדעט דורך הרב בן ציון חי עוזיאל.